زيزى عادل بعد إعتزالها الغناء :عاوزة أقابل ربنا وهو راضى عنى

أعلنت المطربة زيزى عادل اعتزالها مجال الغناء نهائيًا، مشيرةً إلى أنها قررت الابتعاد عن الشهرة.

ونشرت زيزي عادل مقطع فيديو عبر حسابها في «إنستجرام»، أعلنت فيه اعتزالها الفن الذي هو مصدر رزقها، وقالت إنها خرجت لتقول لمحبيها أهم قرار اتخذته في حياتها.

وقالت زيزي: «أنا طالعة أقول خبر مهم جدا أخدته في حياتي، ويمكن يكون أهم خبر خدته في حياتي، هو قرار الاعتزال، قررت أسيب المهنة اللي أنا بشتغلها».

أنا ببعد عن أكتر حاجة من أكتر من المغريات في الدنيا، اللي هي الشهرة، وهبعد عن الشهرة والأضواء والفنانين، اللي هي الناس بتقرب منها».

تابعت: «الفترة اللي فاتت قربت من ربنا جدا، ولقيت القرآن بيقولي إني لازم أكون ملتزمة، لازم أكون على قد ما أقدر أكون ملتزمة، ويمكن تكونو مستغربين، إني طالعة بشعري ومش محجبة، ده لإن ربنا لسه ما أنعمش عليه بخطوة الحجاب، وبدعي ربنا إني ألبس الحجاب، وكل حاجة بتيجي خطوة خطوة، مفيش حاجة بتيجي مرة واحدة، فأنا خدت خطوة وإن شاء الله تيجي الخطوة اللي بعدها».

واضافت :مش عايزة أخش في حتة الفن حلال والفن حرام، عشان مبقاش طالعة بتكلم كإني داعية، أنا طالعة أتكلم كزيزي، وطالعة أقول إني بطلت أغني، لإني مش صح، وديني بيقول كده، وأنا حابة إني أموت وربنا راضي عني، وكلنا نمتنى حاجة زي دي، وعايزة أموت اكون مستعدة لمقابلة ربنا، وأكون راضية عن نفسي وعن حياتي وعن شخصي وعن أفعالي، والحمد لله التزمت، وقربت من ربنا طبعا بطريقة كويسة، وربنا يكرم والتزم أكتر وأكتر، وعايزاكم تدعولي ربنا يثبتني».

يذكر أن زيزى عادل .شاركت فى برنامج ستار أكاديمى 2 وحصلت على المركز الثالث، وطرحت ألبومها الأول واحدة طيبة فى 2007، وغابت عن الساحة الغنائية لمدة 7 سنوات بسبب وفاة والدها، وفى 2014 عادت للساحة الغنائية بأغنية "شايلاهالك". 

وكان آخر ألبوماتها كان بعنوان أنا أنثى عام 2015، ومن أشهر أغانيها حب مش محسوب عليا وأبسط نفسك.