رُوحِى سَبَقِتْنِى قصيدة كلمات الأديب سيد خليل زيدان

رُوحِى لِيكِ سَبَقِتنى
جِرْيِتْ عَلِيكِ وفَاتِتْنى
بَصّيتْ لِرُوحى و لَقِيتْنى
بَاجْرِى وَرَاها واجِيلِكْ
كَلِّمِتْنى مِ السَّمَا رُوُحِكْ
لَقِيتْها فِ الأَرْضْ رُوحِى
سِمِعْت فِ الْهَوى بُوحِكْ
لَقِيتُه صَدَى بُوحِى
أَكَلِّمْ نَفْسِى وَلَا مْصَدَّق
واضْحَك مِنْ جُوَّايَا
الدَّمْع فِ عْيُونِى رَقْرَقْ
دَمْع فَرْحِتِى وْهَنَايا
أَكَلِّمِكْ وَاسْمَعْلِكْ
أَلَاقِيكِ وَالله سَامْعَانِى
طَايْرَه فِ السَّما اطْلَعْلِكْ
وَلا حَاجَه عَنّكْ تِمْنَعْنِى
إِتْوَلَدْتْ أَنا بِيكِ
كِبِرْتْ لَقِيتْنِى فِيكِ
تِبُصّيلِى تِراعِيلِى
أَقُولِكْ شُبّيكِ لُبّيكِ
فَاكْرَه الّلى كَان وأنِينٌه
فَاكْرَه الْقلْب وِحَنِينُه
لَمّا كُنّا نُصْرُخ وِنْهَاتِى وِنْقُولْ
وَلا وَاحِد فَاهِم الأُصُولْ
وِشْرِبْنا مِ الصّبْرِ مَرَارُه
ولَيَالِينَا نَهَارْ لَحَدْ الفَجْرْ
والكُل غَافِل عنِ الحَب وِقَرَارُه
والنَّاس مِشْ فَاهْمَه أَسْرَارُه
عَايْشِين حَياتْهُم ظُلْمِ وْغَدْر
وعَلِيها كَمَان كِتِير مِ الهَجْر
حَفَرُوا بِنَارْهُم جُوَّانا الْجَرْحْ
وِيَارِيتْهُم  سَايْبِينُه
دُولْ عَاوْزِينُه يِطْرَحْ  طَرْحْ
عَنَاقِيدْ حُزْن إحْنَا الّلى شَايْلِينُه
وِلَمّا الصّبْر فِينَا كَانْ
قُلُوبْنا تِفرَحْ بِالأَذَانْ
نِطَفّى بِالصَّلاه بُرْكَانْ
وَاشُوف بِالأمَل قَنَادِيلِكْ
أَبُصْ لِلسَّما واحْكِيلِكْ
مَا انَا سَامِعْ دَقِةْ خَطْوِتِكْ
بَشُوفْهَا نُورْ بِعْيُونِى
أَغَمَّض عَلِيهَا بِجْفُونِى
أَلَاقِينِى هَايِم  فِ مْحَبِتِكْ
وَادِينِى بِالصَّبر لَقِيتِكْ
وَهَاجِيلِكْ لَحَد بِيتِكْ
وَلَا هَاسْأَل عَلِيكِ إِنسَانْ
أَصْل رُوحِى عَارْفَه العِنْوَانْ
مَا هِى فِ الْحُبْ دَلِيلِى
وَابْقَى حَلِيلِكْ وانتِ حَلِيلِى
مرسى علم 6/9/2014
الخامسة صباحًا
من ديوان / بنت جنية