جميلة تلك الإنجازات التي تخرج للنور من خلف جدران صلبة، نحتت فيها العزيمة واسقطتها الإرادة، وداست على حطامها الأحلام. هذا ما نتذكره عندما نبدأ بالحديث عن الشباب المصري الواعد، جيل الغد، فكثيرة هي امثلة الشباب الذين تحدوا ظروف الحياة القاسية ليحققوا احلامهم، ومنهم المهندس مصطفي السويفي ابن قريه كفر خضره محافظه المنوفيه يبلغ 24 عاما حاصل علي بكالوريوس علوم حاسب ، قام بتصنيع سياره تعمل بضغط الهواء واستغني عن البنزين .المنصة بوست التقت به لتتحدث معه عن انجازه .
نشأة الفكرة
هل لك أن تحدثنا عن ماذا تدور فكره صنع السيارة ؟
فكره العربيه جاءت لي ان موتور البنزين شغال انه بيدخل بنزين داخل محرك وشراره تساعد على الاشتعال هيولد انفجار والانفجار يولد طاقه وهذا الضغط بيشغل الموتور ، فانا بدل ما اجيب بنزين وشراره يولدوا لي ضغط لا انا بجيب الضغط من بره من الهواء يبقي كده استغنيت عن الشرارة والبنزين وفي موتور اسمه بينوماتيك شغال بالهواء عباره عن ضغط هواء بيديني حركه ميكانيكيه ودا تم تعديله واستخدمته للعربيه .
هل السيارة تعتمد على موتور البيوماتيك فقط ؟
نعم تعتمد عليه مثلها مثل سيارة الكهرباءالمعتمدة على بطاريه وماتورأما السيارة الجدية تعتمد ا تنك للهواء وماتور للهواء
ما هو الفرق بين موتور الكهرباء و موتور الهواء او البينوماتيك ؟
الفرق ان تنك الهواء ما فيهوش مده صلاحيه زي البطاريه الكهربائيه لها مده معينه وتتغير كل ما تكون الماتريال للتنك اقوى واحسن هتمشي معي مسافات اكبر وسرعه اعلى
صف لنا السيارة واستخداماتها ؟
عبارة عن فور باي فور وفيها دفع رباعي وفيها تنك هواء وموتور والشاسيه و اتوماتيك ودواسه هواء اكسراتير هواء وفرامل وحاجه زي غيارات لتبادل السير الأمام او ترجع للخلف والدركسيون واسمها سامي نسبه الى والدي.
المواصفات والمزايا
من شجعك في البدايه على فكره تنفيذها ؟
والدي هو اللي ساعدني ووقف جنبي وتبني الموضوع من الاول وكان مصدقني وواثق فيا لان الناس كانت بتقول مستحيل تتحرك هو اللي وقف معايا من الاول خالص وكمان دكتوري ورئيس القسم في المعهد دكتور اسامه هو اللي بدا معي من الاول لحد ماوصلت لبراءة الاختراع وما سبنيش في اي حاجه وهو اللي تحرك على براءه الاختراع علشان اخذها .
كم تكلفه السيارة ؟
تعد تكلفتها قليله جدا هي مكلفاني انا كثير لانها ثاني اصدار فا الاصدارين مكلفين 60,000 جنيه ومن ضمنهم الحاجات اللي اتهدرت فالو هعمل عربيه بنفس الشكل ثاني هتتكلف 15,000 جنيه فقط
المشروع يحتاج دعم من كل اتجاه ومواد أساسية عاليه وتصنيع كويس وفلوس وفريق عمل من مهندسين وعمال تصنيع وخطوط انتاج
ما هي سرعه السيارة ؟
سرعتها 40 لانها غيار واحد وسرعه واحده بعد كده بعد التطوير هيبقى فيه سرعات كثيرة.
ازاي مستخدم العربيه يعرف التنك فيه قد ايه هواء وهتمشي قد ايه ؟
نفس فكرة العربيه الكهربائيه البنزين البنزين خلص يبقى يتحط بنزين من محطه بنزين، وفي مؤشر في العربيه بيقول فيها قد ايه من الهواء و هتمشي كم كيلو و هيبقى في محطات شحن في الطريق
التنك اللي استخدمته يمشي العربيه قد ايه ؟
هو سعته ثمانيه بار صغير جدا يمشيني نصف كيلو فقط ، اما الخزان اللي انا عايزه ماتريال تكون قويه و تشحن لي 800 بار، وال800 بار ممكن يمشوني 400 كيلو .
محتاج تطور ايه في العربيه الفتره الجايه ؟
العربيه كلها محتاجه تطوير من اولها لاخرها معموله في البيت عندي يعني امكانيات ضعيفه جدا لكن لما العربيه تروح مصانع او خط انتاج وامكانيات عاليه هتبقى حاجه كويسه وتطوير عالي والماتور يتطور ما يبقاش فيه فقد حتى لو واحد في المئه ، والخزان يشيل 800 بار او 1000 بار ، ال800 بار على الموتور بتاعي من غير التطوير يمشوني 400 كيلو لكن على موتور متطور فيما بعد ممكن يمشوني 800 كيلو واكثر .
ايه اسباب عملك بالميكانيكا عكس دراستك ؟
انا كان طموحي ادخل ميكانيكا سيارات ماجبتش مجموع في الثانويه فادخلت علوم حاسب ودي كانت حاجه مضيقاني وماكنتش فاهم حاجه في الحاسبات ودماغي كلها في الميكانيكا فاعرفت اني في مكان غلط وماتعودتش انسحب من المكان اللي انا فيه ولازم اثبت وجودي فاكنت بحاول في الميكانيكا وطموحي بجانب دراستي
متي بدأت تنفيذ الفكره ؟
فكرت فيها وانا في اولى جامعه نفذتها وانا في تالته جامعه ، اول اصدار اخد مني وقت سنه ونص وتاني اصدار اخد وقت سنه او اقل وخلصان 2020 شهر 9
عرضت مشروعك لأي جهة لدعمك ماديآ ؟
لا لسه ماعرضتهاش علي اي جهة لاني بعد مااخدت براءه الاختراع ، انتبهت لدراستي علشان اخلصها
هل يوجد اي اعطال في السيارة ، وكم وتكلفة صيانتها ؟
مافيش اي اعطال فيها نهائي وامان جدا من كل اتجاه ، وتكلفه صيانتها قليله جدا ، الماتور مش غالي خالص واغلي ماتور بماتيريل عالي يوصل تكلفته 10000 جنيه فقط .
تطوير المشروع والدعم
محتاج ايه لتطوير المشروع ؟
محتاج دعم من كل اتجاه وماتيريل عاليه وتصنيع كويس وفلوس وفريق عمل من مهندسين وعمال تصنيع وخطوط انتاج
كم عدد الساعات اللي كنت بتشتغلها علي المشروع في اليوم ؟
كان بيجي عليا اسبوع كنت بشتغل ليل ونهار واسبوع كنت بستني النهار يطلع علشان اروح اشتغل وكان اسبوع الاقي المغرب بيأذن بدري جدا وانا مش عاوز النهار يخلص عاوز اكمل وكنت ايام بريح واركز مع الكليه لاني كنت بحس بالذنب اني هاملها شويه
ما فكرتش تبيعه لاي جهة لتنفيذ المشروع ؟
لا ابدا انا اتعرض عليا ابيعه بمليون دولار من الصين وانا رفضت لانهم كانوا هياخدوا مني من غير اي تدخل ليا في تصنيعها ومايكونش ليا علاقه بيها تاني ، بس ماينفعش لانه حلمي
محتاج ايه من الدوله ؟
محتاج دعم انا مش عاوز المشروع يخرج برا مصر.
إضافة تعليق جديد